Кніга Псальмаў, псальм 96

Псальма Давіда, калі ўладжвалася зямля ягоная.

Валадарыць Гасподзь: хай радуецца зямля; хай весяляцца шматлікія выспы.

Хмара і змрок навокал Яго; праўда і суд - аснова трона Ягонага.

Прад Ім ідзе вагонь, і наўкол выпальвае ворагаў Ягоных.

Маланкі Ягоныя асьвятляюць сусьвет; зямля бачыць, і трымціць.

Горы, як воск, растаюць ад аблічча Гасподняга, ад аблічча Госпада ўсёй зямлі.

Нябёсы абвяшчаюць праўду Ягоную, і ўсе народы бачаць славу Ягоную.

Хай пасаромяцца ўсе, хто служыць балванам, хто хваліцца ідаламі. Пакланецеся Яму, усе багі.

Чуе Сіён, і радуецца, і весяляцца дочкі Юдавы дзеля судоў Тваіх, Госпадзе,

бо Ты, Госпадзе, высокі над усёю зямлёю, узьнесены над усімі божышчамі.

Хто любіць Госпада, ненавідзьце зло! Ён захоўвае душы сьвятых Сваіх; з рукі бязбожных вызваляе іх.

Сьвятло зьзяе на праведніка, і на тых, хто справядлівы сэрцам, лье весялосьць.

Радуйцеся, праведныя, у Госпадзе, і слаўце памяць сьвятыні Ягонай.