Psa Mga Salmo, salmo Mga Salmo, salmo 124
Awit na isinulat ni David para sa mga umaakyat sa Jerusalem upang sumamba sa Panginoon.
Kung ang Panginoon ay hindi pumanig sa atin,
ano kaya ang nangyari?
Sumagot kayo mga taga-Israel!
Kung ang Panginoon ay hindi pumanig sa atin
noong sinalakay tayo ng ating mga kaaway,
marahil ay pinatay na nila tayo,
dahil sa matinding galit nila sa atin;
para siguro silang bahang tumangay sa atin
o malakas na agos na lumunod sa atin.
Purihin ang Panginoon,
dahil hindi niya pinayagang lapain tayo
ng ating mga kaaway.
Nakatakas tayo,
katulad ng ibong nakawala
sa nasirang bitag.
Ang tulong natin ay nagmula sa Panginoon,
na lumikha ng langit at lupa.