Psa Mga Salmo, salmo Mga Salmo, salmo 6
Para sa direktor ng mga mang-aawit: Awit na isinulat ni David na sinasaliwan ng instrumentong may walong kuwerdas.
O Panginoon, huwag nʼyo po akong sawayin
kapag kayoʼy galit sa akin;
Huwag nʼyo po akong parusahan
kapag kayoʼy napopoot sa akin.
Akoʼy inyong kahabagan sa aking kahinaan,
at pagalingin ang dumaraing kong kalamnan.
Akoʼy labis na nababagabag.
Hanggang kailan, O Panginoon,
hanggang kailan ako magiging ganito?
Panginoon akoʼy inyong dinggin
at akoʼy sagipin.
Iligtas nʼyo ako sa kamatayan
alang-alang sa pag-ibig nʼyo sa akin.
Sapagkat ang patay
ay ʼdi ka na maaalala.
Sa mundo ng mga patay
wala nang makakapagpuri pa.
Akoʼy pagod na sa sobrang pagdaing.
Gabi-gabiʼy basa ng luha
ang aking higaan;
sa pag-iyak koʼy basang-basa
ang aking unan.
Ang paningin koʼy nanlalabo
dahil sa sobrang lungkot ko;
Ang mga mata koʼy namumugto
dahil sa mga kaaway ko.
Layuan nʼyo ako,
kayong gumagawa ng masama,
sapagkat dininig na ng Panginoon
ang aking pag-iyak.
Narinig niya ang paghingi ko ng tulong,
at sasagutin niya ang aking dalangin.
Mapapahiya at matatakot
ang lahat ng aking kaaway;
Bigla silang tatakas dahil sa sobrang kahihiyan.