Sl Salmos, salmo Livro dos Salmos, salmo 13

Въ коне́цъ, ѱало́мъ дв҃дꙋ

Речѐ безꙋ́менъ въ се́рдцы свое́мъ: нѣ́сть бг҃ъ. Растлѣ́ша и҆ ѡ҆мерзи́шасѧ въ начина́нїихъ: нѣ́сть творѧ́й бл҃госты́ню.

Гдⷭ҇ь съ нб҃сѐ прини́че на сы́ны человѣ́чєскїѧ, ви́дѣти, а҆́ще є҆́сть разꙋмѣва́ѧй, и҆лѝ взыска́ѧй бг҃а.

Всѝ ѹ҆клони́шасѧ, вкꙋ́пѣ неключи́ми бы́ша: нѣ́сть творѧ́й бл҃госты́ню, нѣ́сть до є҆ди́нагѡ.

Ни лѝ ѹ҆разꙋмѣ́ютъ всѝ дѣ́лающїи беззако́нїе, снѣда́ющїи лю́ди моѧ̑ въ снѣ́дь хлѣ́ба; гдⷭ҇а не призва́ша.

Та́мѡ ѹ҆боѧ́шасѧ стра́ха, и҆дѣ́же не бѣ̀ стра́хъ: ꙗ҆́кѡ гдⷭ҇ь въ ро́дѣ првⷣныхъ.

Совѣ́тъ ни́щагѡ посрами́сте: гдⷭ҇ь же ѹ҆пова́нїе є҆гѡ̀ є҆́сть.

Кто̀ да́стъ ѿ сїѡ́на сп҃се́нїе і҆и҃лево;

Внегда̀ возврати́тъ гдⷭ҇ь плѣне́нїе люде́й свои́хъ, возра́дꙋетсѧ і҆а́кѡвъ, и҆ возвесели́тсѧ і҆и҃ль.