Num Numero, kapitulo Mga Numero, kapitulo 34
Ang mga Border sang Canaan
Nagsiling ang Ginoo kay Moises, “Silinga ang mga Israelinhon nga kon magsulod na sila sa Canaan, amo ini ang border sang duta nga ila palanublion:
“Ang border sa south amo ang kamingawan sang Zin, sa border sang Edom. Magasugod ini sa south sang Patay nga Dagat.34:3 Patay nga Dagat: sa Hebreo, maasin gid nga dagat. Amo man sa bersikulo 12. Dayon magaliko ini pa-south pakadto sa Taklaran sang Akrabim, hasta sa kamingawan sang Zin, kag magapadayon sa south sang Kadesh Barnea. Dayon magaderetso ini sa Hazar Addar hasta sa Azmon, kag magaliko pakadto sa ililigan sang tubig sang Egypt, kag magatapos sa Dagat sang Mediteraneo.
“Ang border sa west amo ang Dagat sang Mediteraneo.
“Ang border sa north magahalin sa Mediteraneo pakadto sa Bukid sang Hor, kag halin sa Bukid sang Hor pakadto sa Lebo Hamat. Magapadayon ini sa Zedad hasta sa Zifron kag magatapos sa Hazar Enan.
“Ang border sa east magahalin sa Hazar Enan pakadto sa Shefam. Dayon magadulhog ini pakadto sa Ribla, sa east sang Ain, kag magapadayon ini sa mga bulobukid sa east sang Dagat sang Galilea.34:11 Galilea: sa Hebreo, Kineret Dayon magapadulhog ini sa Jordan kag magatapos sa Patay nga Dagat.
“Amo ini ang inyo duta, kag ang iya mga border sa palibot.”
Dayon nagsiling si Moises sa mga Israelinhon, “Partidahon ninyo ini nga duta bilang palanublion ninyo paagi sa paggabot-gabot. Nagsiling ang Ginoo nga ihatag ini sa siyam kag tunga nga tribo, kay ang tribo ni Reuben, ni Gad, kag ang katunga sang tribo ni Manase nakabaton na sang ila palanublion sa east sang Jordan malapit sa Jerico.”
Nagsiling ang Ginoo kay Moises, “Si Eleazar nga pari kag si Josue nga anak ni Nun amo ang magapartida sang duta para sa mga tawo. Kag magpili ka sang isa ka pangulo sa kada tribo sa pagbulig sa ila sa pagpartida sang duta.” Amo ini ang mga ngalan sang mga ginpili:
| Tribo | Pangulo |
|---|---|
| Juda | Caleb nga anak ni Jefune |
| Simeon | Shemuel nga anak ni Amihud |
| Benjamin | Elidad nga anak ni Kislon |
| Dan | Buki nga anak ni Jogli |
| Manase nga anak ni Jose | Haniel nga anak ni Efod |
| Efraim nga anak ni Jose | Kemuel nga anak ni Shiftan |
| Zebulun | Elizafan nga anak ni Parnac |
| Isacar | Paltiel nga anak ni Azan |
| Asher | Ahihud nga anak ni Shelomi |
| Naftali | Pedahel nga anak ni Amihud |
Sila ang mga ginpili sang Ginoo sa pagbulig partida sang duta sang Canaan bilang palanublion sang mga Israelinhon.