Пс Псалтыр, псалом Псалтыр, псалом 120

Сьпеў узыходжаньня. Да ГОСПАДА я клікаў у бядзе маёй, і Ён адказаў мне.

ГОСПАДЗЕ, вызваль душу маю ад вуснаў хлусьлівых, ад языка здрадлівага.

Што дасьць табе і якую карысьць прынясе язык здрадлівы?

Вострыя стрэлы волата і вугольле ядлоўцавае.

Гора мне, што я жыву ў Мэшэха, што я пасяліўся каля намётаў Кедару!

Вельмі доўга душа мая жыла сярод тых, што ненавідзяць супакой.

Я — [сам] супакой; але, як толькі прамоўлю, яны [пачынаюць] вайну.